logo

"İnternasional" "Media turniri-2"nin qalibi oldu

image
AFFA-nın dəstəyi, İctimai Futbol Təşkilatları İctimai Birliyinin təşkilatçılığı ilə idman jurnalistləri arasında 2 ay müddətində təşkil edilən “MEDİA turniri-2” başa çatıb. 2018-cı ilin idman jurnalistləri arasında keçirilmiş ən mötəbər turnirinin həlledici görüşləri AFFA-nın stadionunda baş tutub. Bürünc mükafat uğrunda keçirilən qarşılaşmada "Bakı" "Futbol+ qəzeti"ni 7:3 hesabı ilə üstələyərək bürünc medallara sahib çıxıb. Turnirin həlledici qarşılaşmada isə ilk turnirin finalçısı ilə bürünc medalçısı üz-üzə gəlib. Gərgin keçən oyunun taleyini 1 qol həll edib. Qarşılaşmanın başa çatmasına 2 dəqiqə qalmış Anar Əsədovun qolu sayəsində hesabda önə keçən “İnternasional” “Media turniri-2”nin qalibi olub.

Final oyunu başa çatdıqda sonra komandalar medallar, kuboklar və müxtəlif hədiyyələrlə təltif ediliblər. “Bakı”, “İdman Azərbaycan” və “İnternasional”a müvafiq olaraq bürünc, gümüş və qızıl medallar, eyni zamanda hər üç komandaya kubok təqdim edilib. “İnternasional”ın qapıçısı Yusif Hüseynov turnirin ən yaxşı qapıçısı, “Bakı”nın təcrübəli hücumçusu Elnur Əşrəfoğlu isə ən yaxşı oyunçu nominasiyasına layiq görülüb. Yeri gəlmişkən, Əşrəfoğluna mükafatı təqdim edən futzal üzrə Azərbaycan millisinin kapitanı Rizvan Fərzəliyev Avropa çempionatının final mərhələsində geyindiyi millinin formasını da hədiyyə edib. Turnirin bombardiri isə 15 qol vuran Xanoğlan İmanov olub.

Komandalara mükafatları AFFA-nın baş katibinin müavini Sərxan Hacıyev, AFFA-nın Mətbuat və İctimaiyyətlə əlaqələr şöbəsinin rəisi Firuz Abdulla, PFL-in Mətbuat və İctimaiyyətlə əlaqələr şöbəsinin rəisi Aslan Şahgəldiyev, futbol veteranı Asim Xudiyev, futzal üzrə Azərbaycan millisinin kapitanı Rizvan Fərzəliyev təqdim ediblər.

6 may
3-cü yer uğrunda oyun
Futbol+ - Bakı 3:7
Qollar: Kənan Həsənov (2), Vüsal Mahmudov // Ruslan Mikayıllı (2), Emin Səfərov (2), Etibar Tağıyev, Elnur Əşrəfoğlu, İbrahim Cəfərov.

Final
İnternasional – İdman Azərbaycan 1:0
Qol: Anar Əsədov.